Ga Malai ni a lachyum

GA MALAI NI A LACHYUM1. Tsasam Ga Kam Yang Mayam, Hkamau Sha Ai Gaw Bainam Ndai ga gaw ga malai rai nga ai. Jinghku n re ai tsasam ni a ga kam yang mayam byin tai chye ai hpe shadum ai ga malai re. Kam ging a ni? N kam ging a ni? ngu dinglik dinglun sawn sumru chye chyang ra ai hpe madi madun ai mung re. Lam mi sawn yu ga ngu yang, hpaji daw shingran kaja mu mada ra ai hpe mung shadan shaleng ai. 1948 ning hta shanglawt lu mayu ai myit nau katu ai majaw Panglung Munggyit Gagyit Gasadi Laika hta shanglawm ai majaw daini na ban prat hta n hkrum n hkra ging ai tsinyam tsindam ni hkrum hkra hkam sha ra ai gaw tsasam ga kam ai majaw rai nga ai. Dusat myu mi rai nga ai bainam ni sha ra dik gaw hkamaupa namlap re. Moi de bainam rim la na lagu la na nga jang, masha n nga ai shara de, hkamau lap hte bainam hpe shalen la nna, gyit dun la chye ma ai. Ndai mabyin lahkawng hpe mahta nna, ndai zawn ga malai shagawp ma ai law.

2. Punghkup Shat Hkum Sha, Sake Manawn Hkum la. Punghkup shat – Makoi da ip da ra ai ahkyak lareng ni hpe taihpyen wa hpe tsun shapraw dan nna la sha ai sake manawn mayun kumhpa, Wuhpung Wuhpawng ting hpe tsai mat nyip mat hkra shabyin ya lu ai mayun kumhpa, (sake manawn hta mung grau kaba ai.) Punghkup Nanghpam lusha hpe punghkup lu na shakut shaja ai ngu ai lachyum hte bung ai. Matu mara n dan hkra, makru n prut hkra, atsai awai Amyu langai rawt jat galu kaba wa na lam hta; grau nna: rawt malan hkrunlam hta punghkup shat sha ai marai langai ngai n lawm na, n galaw hkrup na gaw grai nan ahkyak ai hpe shadum ai ga malai re. Anhte Wunpawng amyusha ni a labau mabyin ni kaw na mahta shaw shapraw la ai ga malai re. Ndai ga malai hpe matsing gun let sadi maja mai nga ai law.

3. Hpyi Gaw N waw Nra Gaw Daw, Hpyi mung waw Nra Mung Daw. Ndai ga malai gaw lapawp a kamu si machyin ngu ai ga malai hte mung bung ai. Mungga (Zuphpawng laika) hta gaw sha tim mu na zawn re ai dwisau ga gamung chyu tsun, myit masin kraw kata hta gaw risi tum daram magyi ai hpe tsun ai. Adan aleng tsun ga nga jang, ” Kayet u! Hpyi gaw n waw , nra gaw daw” hkra kayet u. Bai, hpyi mung waw, nra mung daw u ga ngu ai lachyum rai. Daini anhte hkrum sha hkam sha nga ai mabyin ni gaw ndai ga malai a lachyum hte grai wa nan bung ai hpe dum chye mai nga ai law.

Tags:

Leave a Reply

Your email address will not be published. Required fields are marked *

*