Sali Wunli Hkringhtawng

By hkawp Pungwa

Sali wunli hkringhtawng ngu ai gaw jiwoi jiwa ni a ban prat kaw nna, ya daini na aten du hkra ngang grin jai lang mai nga ai mai kaja ailawnglam magup sumhpa hpe ngu ai rai nga ai.

Sali wunli hkringhtawng hpan lahkawng nga ai. Langai mi gaw myi chyaw n mu lu ai hkringhtawng, lahkawng ngu na gaw myi chyaw mu lu, masawp magra lu ai hkringhtawng ni rai nga ai.

Myi hte chyaw n mu lu ai sali wunli hkringhtawng ngu ai hta; - Hpan Madu, Hpan Ningsang Shagyit Pawt Ninghpang chye Ningchyang teng sha nga ai ngu ai makam, shi hpe tutnawng jaw jau shakawn kungdawn nga nhtawm, kahpu kanau mayu shayi dauni dauma, kaji kajum kashu kahkri nga nna shachyen shaga, mahku mahkau mahku mara ai len ningli, tsun shaga ai ga ni, mying shamying daidaw ai lam ni, maumwi mausa, ga malai ga shagawp ni, pungsu gani,.... lawm ai rai. Sakse sakkan atawng apa nan n lu madun tim myit masin bawnu machye machyang hte sha hkawn hkrang lu ai lawnglam ni rai nga ai.

Myi hte chyaw mu lu ai sali wunli hkringhtawng law law nga nga ai kaw na nkau mi gaw;- Rida maka kum la ni, kaji katawng wa ai lata hpaji, hpri-nai hpaji, jangngun hpaji, gawgap hpaji, hkailu hkaisha remlu rem sha hpaji, shangai shaprat mayat maya hpaji, buhpun palawng sumraw shakya hpaji, gasat gala hpaji, majoi shingra ni, Bum mying ni, ninghtawn ningngat mying ni, hkanu hkashi mying ni, hka daru mying ni, laungpu lungwap mying ni, hpri maw ja maw mying ni, manau shadung hte maka kumla ni,... zawn re ai ni rai nga ai.

Lahta de tang madun ai hkringhtawng ni sha n ga, kaga lawlaw mung naw nga nga ai.

Daini na anhte a ban prat hta mu lu ai gaw Manau wang manau pa rai nga ai. 2002 ning hta galaw ai Mali Hpungmai Mazup Myitkyina Majoi Hkumra Manau Poi kaba hta gaw;- shangwang 63.13 eka dam pa ai Manau Pa ningnan hpe Sutdu Yup Zau Hkawng woi awn nna, Manau Yinwa ngu daidaw la lu saga ai law.

Ningre ai sali wunli hkringhtawng ni hpe n hten n mat hkra makawp maga na gaw nang ngai anhte yawng a labau lit nan rai nga mali ai.

Dai lit hpe makawp maga ai shaloi; sahpau jat la ai lam, shayawm kau, yet kau ai lam n nga, nangshoi nangsha n nga, myitmang hkrum let lahkrip ra ra, hpawng chyawm ladat hte n hkring n sa, n hkrit n tsang shakut shaja sa wa ai rai yang, mungkan hta dan hkung dan dawng ai sali wunli hkringhtawng tai wa na gaw loi nli hkret npai rai nga mali ai. Sali wunli hkringhtawng hpe makawp maga ai lam gaw Wunpawng amyu shani mungkan hta ngang grin danhkung ai amyu byin tai na matu shakut shaja ai lam a dawhpum dawnu tai wa u ga ngu ninggawn shawa hpe ga saw ai rai.

Labau shang, sali wunli hkringhtawng hpe makawp maga ai lam gaw si mani ai ladat hte ja gumhpraw sutgan jahting ai amu langai mi re ai hpe mung myit dum mai nga ai. Dai ni nga ai shara de, maigan masha ni sa du sa chyai hkaja mayu ai myit masin rawng hkra, ndau shana shabra ai lam ni mung galaw ra na rai nga ai. Ningre ai bungli ni byin tai hkra shakut ai lam gaw, ramma shayi shadang sha ni hpe kan bau bungli jaw ya ai lam byin tai wa u ga ngu yaw shada let, sali wunli hkringhtawng ni hpe makawp maga ai magam bungli hta myit masin bawnu atsam marai n'gun dat shang lawm ga ngu ndau shana lu ai rai.












Leave a Reply

Your email address will not be published. Required fields are marked *

*